Ekonomia Itunaren Batzorde Mistoak (EIBM)  2021eko uztailaren 29an erabaki batzuk hartu zituen, erabaki gabe zeuden hiru zerga-figuren hitzarmenari eta, ondorioz, Ekonomia Itunari eragiten dietenak. Figura horiek Finantza-transakzioen gaineko Zergaren eta Zerbitzu Digitalen gaineko Zergaren eta BEZaren leihatila bakarreko (OSS)  erregimen berriak dira.

Gainera, Eusko Jaurlaritzaren eta Arabako, Bizkaiko eta Gipuzkoako foru-aldundien 2022rako defizitaren eta zorraren erreferentzia-tasak erabaki dira eta Ekonomia Itunaren Arbitraje Batzordea berritu da. Arbitraje Batzordea Ekonomia Itunaren lotura-puntuei dagokienez administrazioen artean sor daitezkeen gatazkak ebazteko organoa da.

Lehenengoei dagokienez, EIBMk Ituna aldatzea erabaki du, honako hauetan ituna  sartzeko:

• Finantza-transakzioen gaineko Zerga – FTZ–

Burtsa-balioa 1.000 M/€ baino handiagoa duten konpainia kotizatuen akzioen erosketak zergapetzen dituen zeharkako zerga. EIBMren  erabakiak ezartzen du FTZ biltzeko lotura-puntua akzioak eskuratzen diren enpresen sozietatearen egoitza izango dela.

• Zerbitzu digital jakin batzuen gaineko Zerga – ZDJBZ-

Lineako publizitateko, lineako bitartekaritzako eta datuen transmisioko zerbitzu digitalak % 3 kargatzen dituen zerga. Erabakiak  zerbitzu horietan parte hartzen duen erabiltzailea non dagoen ezartzen du konexio-puntu gisa.

• Merkataritza Elektronikoaren BEZa (BEZ OSS)

BEZaren araubide bereziaren arabera, enpresek beren ogasunari jasanarazi eta ordaindu behar diote beren salmentei dagokien zenbatekoa, kontsumitzailea dagoen herrialdeko BEZaren tasa aplikatuta. Ondoren, informazioa eta finantza-fluxuak trukatu behar dira estatu kideetako ogasunen artean, BEZa kontsumoa gertatu den herrialdean sartuta gera dadin.

Ekonomia Ituna aldatzeko erabakia, lege-proiektu gisa izapidetu zena, abenduaren 27an onartu zen Kongresuan, aldeko 280 botorekin, kontrako 57rekin eta 4 abstentziorekin. Senatuan onarpen hori otsailaren 2an  gertatu zen, emandako 261 botoetatik 253 senatarien aldeko botoekin (kontrako 5 eta 3 abstentzio). Azkenik, otsailaren 9ko Estatuko Aldizkari Ofizialak 1/2022 Legea argitaratu zuen, otsailaren 8koa, Euskal Autonomia Erkidegoarekiko Ekonomia Ituna aldatzen duena.

Itundutako testuaren aldaketa indarrean sartzen denean foru-ogasunak zerga berriak kudeatzen hasiko dira. Zerga Administrazioko Estatu Agentziak zerga-figura berriak indarrean sartu zirenetik bildutako diru-sarrerak, itundutako lotura-puntuen arabera lurralde historikoei dagozkienak, foru-ogasunen esku utzi beharko dira.

Ekonomia Itunaren aldaketaz gain, 2021eko uztailaren 29ko EIBMk  % 0,9ko defizitaren eta % 15,6ko zorraren erreferentzia-tasak erabaki zituen 2022rako erakunde erkideentzat. Foru-aldundien defizita, berriz, % 0,2koa izango da BPGaren gaineko ehunekoari dagokionez. Kupo likidoen, finantza-konpentsazioen eta enplegu-politika aktiboen behin betiko (2020) eta behin-behineko (2021) balorazioak ere  erabaki ziren.

Azkenik, EIBMk erabaki zuen Violeta Ruiz Almendral andrea, doktorea eta Madrilgo Carlos III.a Unibertsitateko Finantza eta Zerga Zuzenbideko irakasle titularra, Ekonomia Itunaren Arbitraje Batzordeko presidente izendatzea. Halaber, Javier Muguruza Arrese jauna eta Sofia Arana Landin andrea batzordekide izendatu ziren.